Pages

Monday, May 23, 2011

ရခိုင့်သဘာဝပတ်ဝန်းကျင်ကို သဂြိုလ်ခြင်း

အကျွန်ရို့၏ ရက္ခပူရတိုင်းဌာနီကို သမုတ်ထားရေ နာမေတိထဲမှာ သန္တာမြီဆိုစွာလည်း တစ်ခုအပါအ၀င် ဖြစ်တေ။ အကြောင်းမှာ ကီလိုမီတာ ၇၄၀ ရှည်လျားရေ ရခိုင်ကမ်းရိုးတန်းတလျှောက်မှာ သန္တာကျောက်တန်း ကျောက်ပန်းခက်ကြီးတိ တည်ဟိနိန်လို့ပဲဖြစ်ပါရေ။ သင့်တော်ရေ ရာသီဥတု၊ သင့်တော်ရေ ရီအပူချိန်စရေ အရင်းခံသဘာဝတရားတိ ကောင်းမွန်မှုကြောင့် သန္တာကျောက်တန်းတိရေ နှစ်ပေါင်း သန်းနန့်ချီအောင် ကြာညောင်းတည်တံလျှက်ဟိနိန်ခကတ်တေ။ ရခိုင်ပြည်၏ ခေတ်အဆက်ဆက်က မှီခိုအားထားလာကတ်ရရေ ရီထွက်ကုန်လုပ်ငန်းကိုလည်း အကျိုးပြုလာခပါရေ။ ငါး၊ပုစွန်လုပ်ငန်းရေ ဂနိန့်ရခိုင်ပြည်၏ နိုင်ငံခြားဝင်ငွေ ယှာအပီးဆုံး စီးပွားရေးတစ်ခု ဖြစ်တေ။ (ပုစွန်ကန်ဧကဆိုကေ ၉၇-၉၈ ခုနှစ်လောက်က ၅သောင်းကျော်ရာ ဟိခစွာကနိန် ၀၅-၀၆လောက်မှာ ၂ သိန်း ၂ သောင်း ၀န်းကျင်ထိ ဟိလာသည်။) နောင်အနာဂတ်အတွက်လည်း အရေးကြီးရေ စီးပွားရေးအဆောက်အအုံကြီးတစ်ခုလည်း ဖြစ်တေ။ ယင်းအတွက်ကြောင့် ရက္ခသန္တာမြီ၏ သန္တာကျောက်တန်းတိရေ ရခိုင်ပြည်၏ အမြုတေ ရတနာတစ်ခုဖြစ်တေ။


မြောက်ဦးက ဘိုးစိုင်ဘောင်ဆက် ကိုးကွယ်နိန်ရေ ဘုရားကို ဆီးမီးပန်း ကပ်ဖို့ လားခါမှ ရထားလမ်းစီမံကိန်းကြောင့် ဘုရားတစ်ခြမ်းပါလခပျာယ်မှန်း သိခကတ်ရရေပိုင် အဂုတစ်ဖန်လည်း ရခိုင်ပြည်၏ အမြုတေ ရတနာကို ဒိုင်းနမိုက်ခွဲပနာ ဖျက်ဆီးပလိုက်ပျာယ်လတ်။ ငါးတိလည်း အများအပြား သီကတ်ပါရေလတ်။ သန္တာကောင်ချေတိ၏ လုံ့လနန့် နှစ်ပေါင်းများစွာ တည်ဆောက်ထားရေ သန္တာကျောက်စိုင်တိကို ယင်းသူရို့က စက္ကန့်ပိုင်းအတွင်းမှာ ဖျက်ဆီးပလိုက်ကတ်ပါပျာ။ "ဖြစ်ပျက် ဖြစ်ပျက်"လို့ အနိစ္စတရားကို ရှုရဖို့အစား "ဖြစ်လခယာ ပါလခယာ"လို့ရာ ရှုမှတ်ကတ်ရဖို့ပျာယ်လာ။ မဖြစ်ခင် မသိရရေ ဘ၀၊ မပြောချင် ဂျောင်ထိုးခံထားရရေ ဘ၀၊ မဖြစ်ခင် တားပိုင်ခွင့်မဟိရေ ဘ၀၊ ဖြစ်ပျက်ပြီးကေလေ့ ဇာလောက် ဖြစ်ပျက်လားခလဲ မသိရရေ ဘ၀။

နိုင်ငံခြားကော်ပိုရေးရှင်းတိ၏ တိုက်ရိုက်ရင်းနှီးမြှုပ်နှံမှုတိရေ မြှုပ်နှံခြင်းခံရရေ ဒေသအတွက် စီးပွားရေးဆိုင်ရာ အကျိုးရလဒ်တိကို ပေါ်ထွန်းစီနိုင်ရေ အတွက်ကြောင့် ယေဘုယျအားဖြင့်ဆိုကေ ကြိုဆိုသင့်စွာတော့ အမှန်ပါရာ။ ယေကေလေ့ အဂုပိုင် စနစ်ဆိုး စနစ်ပျက်ကြောင့် ကိုယ့်ပြည်အတွက် အကျိုးမဟိရေအပြင် စီးပွားရေးဆိုင်ရာ၊ သဘာဝပတ်ဝန်းကျင်ဆိုင်ရာ ဆုံးရှုံးမှုတိကိုရာ ရခိုင်သားတိမှာ လက်ဝယ်ပိုက်ကတ်ရပါရေ။ ကိုယ့်ပြည်က သဘာဝဓာတ်ငွေ့ထွက်ယင့်သားနန့် ဖွဲခွံလောင်စာနန့် မီးထွန်းကတ်ရဖို့အနေအထားကို ရောက်နိန်ကတ်ပါပျာယ်။ (ယင်းချင့်တောင် ရက်တိုင်း၊ နေရာတိုင်း ရကတ်ဖို့မဟုတ်ပဲနန့် ကျေးဇူးကြီးလှပါပေတယ် သမ္မတကြီးရေ ဆိုပြီးကေ ထိုင်ရှိခိုးခိုင်းဖို့သိယေ။)

တရုတ်တိ တည်ဆောက်နိန်ရေ စီမံကိန်းတိမှာ ရီနံသန့်စင်ရေးစက်ရုံ၊ ဓာတုဗေဒစက်ရုံတိကလည်း ပါနိန်ရေ။ ယင်းချင့်တိက ရခိုင့်သဘာဝပတ်ဝန်းကျင်အတွက် အထူးစိုရိမ်စရာပါ။ နဂိုကတည်းက စီးပွားရေးနန့် ပတ်သက်လာကေ ဇာတစ်ခုကိုလေ့ ဂရုမစိုက်ဆိုပြီးကေ နာမေကြီးရေ တရုတ်ကုမ်ပဏီတိနန့် မိမိအာဏာမြဲရေးနန့် ပတ်သက်လာကေ ဇာတစ်ခုကိုလေ့ ဂရုမစိုက်တေ နအဖရို့၏ အကြင်လင်မယားဇာတ်ကြောင့် ရခိုင့်သဘာဝပတ်ဝန်းကျင်ရေ ငါးပါးမကလို့ အပါးငါးရာတောင် မှောက်လားနိုင်ရေ။

အရှေ့အလယ်ပိုင်းက လာလတ်တေ ရီနံတင် သင်္ဘောတိ ရခိုင်ပြည်ကမ်းရိုးတန်းနားမှာ ယိုကျလားရေ မှောက်လားရေ ဆိုဂေ ဇာဖြစ်လားဖို့လဲ။ ရီနံတင်သင်္ဘောကနိန် ပိုက်လိုင်းကို အပြောင်းမှာ ယိုကျလားကေ ဇာပိုင်လုပ်ဖို့လဲ။ အနောက်တောင်မုတ်သန်လီ ဆိုင်ကလုန်းဝင်ရောက်မှုကြောင့် ရီနံနန့် တခြား ဓာတ်တုပစ္စည်းတင် သင်္ဘောတိ မှောက်လားကေ သူရို့ ဇာလုပ်ကတ်ဖို့လဲ။ ရီနံသန့်စင် စက်ရုံက ထွက်ဟိလာဖို့ အညစ်အကြေးတိကို ဇာကို သွန်ချကတ်ဖို့လဲ။ ဓာတုအညစ်ကြေးတိကိုဝါ ဇာပိုင်ကိုင်တွယ်ကတ်ဖို့လဲ။ အေလောက် ဥပဒေတင်းကြပ်တေ အမေရိကမှာတောင် ပြီးခရေ နှစ်ထဲက မက္ကဆီကို ပင်လယ်ကွေ့မှာ ရီနံတူးစင်ပေါက်ကွဲမှုကြောင့် ရီနံယိုဖိတ်လို့ ဘီလီလျံပေါင်းများစွာ ဆုံးရှုံးကတ်ရပါရေ။ သားငါးတိရိစ္ဆာန်ပေါင်းများစွာ သီဆုံးကတ်ရပါရေ။ ပုစွန်လုပ်ငန်း၊ ငါးလုပ်ငန်းတိကို အကြီးအကျယ် ဂယက်ရိုက်ခတ်လားရေ။ ယင်း၏အကျိုးယုတ်တိကို နောက်နှစ်ပေါင်းများစွာ ခံကတ်ရဖို့သိဖြစ်တေ။

တရုတ်နိုင်ငံမှာဆိုကေ ပိုတောင် ဆိုးသိရေ။ နှစ်တိုင်း ရီနံယိုဖိတ်မှုတိ တပုံတခေါင်းကြီး။ ပြီးခရေ နှစ် (၂၀၁၀) ဇွန်လက တရုတ်ပြည်၏ အရှေ့မြောက်ဘက်မှာ ဟိရေ ဒဲလ်လီယံလို့ခေါ်ရေ ပင်လယ်ဆိပ်ကမ်းမှာ ရီနံယိုဖိတ်ခရေ။ ရီနံတင်သင်္ဘောကနိန် ပိုက်လိုင်းကို အပြောင်းမှာ ပိုက်လိုင်းနှစ်လိုင်း ပေါက်ကွဲလို့ ရီနံဆီ စည်ပေါင်း ၄သိန်းကျော် ယိုကျလားရေ။ စတုရန်းကီလိုမီတာ ၄၃၀ ကျော်ရေ ပင်လယ်ရီမျက်နှာပြင်ရေ ရီနံဆီတိနန့် ပြန့်ကြဲ ညစ်ပတ်လားရေ။ ယင်းပိုင်ရခိုင်ပြည်မှာလည်း ဖြစ်ဖို့လို့ ပြောလို့ရရေ။ ဇာခါဖြစ်ဖို့လဲရာ စောင့်ကြည့်ရဖို့။ ယင်းပိုင်ဖြစ်ကေ၀ါ။ ခံရဖို့စွာက ရခိုင်သားတိ။ ခံရဖို့စွာက ရခိုင်ပြည်၏ သန္တာကောင်တိ၊ သားငါးပုစွန်တိ၊ လမုတောတိ၊ အကျိုးမြီတိ (wetlands)စရေ သဘာဝပတ်ဝန်းကျင်တိ။ ယင်းနစ်နာမှုတိ၊ နှစ်ပေါင်းတာရှည်နိုင်ရေ ဆုံးရှုံးမှုအတွက်ကလေ့ နစ်နစ်ကြေးရဖို့လမ်းကလည်း မမြင်။ ကျောက်ဖြူက တရုတ်လုပ်ငန်းခွင်တစ်ခုမှာ ကားတိုက်ခံရလို့ ဆေးရုံတင်ရရေ မိန်းမတစ်ယောက်ကို မသဒ္ဒါရီစာ ကျပ် ၂၀၀၀ ရာ နစ်နာကြေးပီးရေလတ်။

မှီငြမ်း
1. National Oceanic and Atmospheric Administration, Coral 101, http://coralreef.noaa.gov/aboutcorals/coral101/, accessed on May 22, 2011.
2. Food and Agriculture Organization of the United Nations, Myanmar - Mission Report on Coastal Aquaculture, http://www.fao.org/docrep/004/ad497e/ad497e05.htm, accessed on May 22, 2011.
3. The Boston Globe, Oil Spill in Dalian, China, http://www.boston.com/bigpicture/2010/07/oil_spill_in_dalian_china.html, accessed on May 22, 2011.
4. Mya Than Tun, Dr. Yin Yin Moe, Soe Hla, Update Fisheries Information, Environment and Overview, http://iwlearn.net/iw-projects/Fsp_112799469247/reports/IWS-14%20Country%20Report%20-%20Myanmar.pdf, accessed on May 23, 2011.
5. Narinjara, ဂတ်စ်ပိုက်လိုင်းတည်ဆောက်ရာတွင် ဒိုင်းနမိုက်ဖြင့် ကျောက်ဆောင်များကို ဖြိုချနေသဖြင့် ရေနေသတ္တ၀ါများ သေဆုံးနေ, http://www.narinjara.com/detailsbur.asp?id=3180, accessed on May 22, 2011.
6. Narinjara, ကားတိုက်ခံရ၍ ဆေးရုံတင်ရသူ အမျိုးသမီးကို တရုတ်ကုမ်ပဏီက ငွေ ၂၀၀၀ သာ လျော်ကြေးပေး, http://www.narinjara.com/detailsbur.asp?id=3171, accessed on May 22, 2011.

0 comments:

Post a Comment

 
© Copyright by AS  |  Template by Blogspot tutorial