Pages

Sunday, July 18, 2010

လရတတ်နာင့် လမွဲနိုင်ငံများ

အင်္ဂလိပ်စကားမှာ Euphemismဆိုရေ အသုံးအနှုန်းတစ်ခု ဟိပါရေ။ စကားတစ်ခုကို အရှိကိုအရှိအတိုင်းပြောလိုက်ကေ ရိုင်းလားဖို့စွာ ကြောက်လို့ ယယိုင်ကျကျေးချေဖြစ်အောင် စကားလှနာင့် အစားထိုးပြီးကေ ခေါ်စွာပါ။ ဥပမာ - အသက်၆၀ကျော် ၇၀ ကျော်လူကြီးတိကို 'Older People' လူကြီးလူအိုလို့သုံးဖို့အစား 'Senior Citizen' အဆင်မြင့်နိုင်ငံသားဆိုပြီးကေ ပြောင်းသုံးကတ်ပါရေ။ ယင်းပိုင် Euphemism အသုံးအနှုန်းတိရေ အထူးသဖြင့် Formalကျရေ အများဆိုင်သုံး၊ ရုံးသုံးစကားရပ်တိမှာ အသုံးများပါရေ။ အဂုလည်း လမွဲနိုင်ငံတိကို သုံးခါ စကားလှချေတိနာင့် အစားထိုးသုံးတတ်ပါရေ။ ဥပမာ- developing country (ဖွံ့ဖြိုးဆဲနိုင်ငံ) modernizing country (တိုးတက်ဆဲနိုင်ငံ) less-developed country (ဖွံ့ဖြိုးမှုနည်းပါးသော နိုင်ငံ) third world country (တတိယအဆင့်အတန်းနိုင်ငံ) စသဖြင့် သုံးတတ်ကတ်ပါရေ။ ယင်းအသုံးအနှုန်းတိမှာ အယူဝါဒပိုင်းဆိုင်ရာ စိကေချေကွဲလွဲမှုတိ ဟိကတ်ပါရေ။ ယေကေလေ့ အားလုံးကတော့ ကမ္ဘာမှာ တိုးတက်မှုအကြီးဆုံး ထပ်သီးနိုင်ငံတိမဟုတ်စွာကတော့ သေချာပါရေ။ ဘောင်ခတ်ပြီးကေ ပပွင့်လလင်း ပြောရဖို့ဆိုကေ လမွဲနိုင်ငံတိပါ။ လရတတ်နိုင်ငံမဟုတ်သိပါ။

တစ်ဘက်မှာလည်း တစ်နိုင်ငံနာင့်တစ်နိုင်ငံရေ မတူကတ်ပါ။ တိုးတက်မှု အရှိန်ဆိုစွာလည်း မတူပါ။ တိုးတက်လာရခြင်း အကြောင်းအရာ၊ တိုးတက်မှုကို အခြေခံရေ စက်မှုအင်အား၊ နည်းပိုင်ညာအင်အားတိကလည်း ကွဲပြားကတ်ပါရေ။ ယင်းပိုင်ပျာယ်တခြားတခြားသော အကြောင်းကိစ္စ (ဥပမာ- ကျွမ်းကျင်လုပ်သားပမာဏ)တိကလည်း ဟိနိန်ပါသိရေ။ ယင်းအတွက်ကြောင့် နိုင်ငံအားလုံးကို လရတတ်၊ လမွဲ ဆိုပြီးကေ သုံးစွာရေ ပြောရလွဲအောင် သုံးခြင်းရာဖြစ်ပါရေ။ သေချာလေ့လာဖို့ဆိုကေ ပုံသေကားချပ်ပြောလို့တော့ မရပါ။ လမွဲနိုင်ငံကလည်း ခေတ်အလျှောက်တိုးတက်ပြောင်းလဲလာတတ်ပါရေ။ မမွဲတမွဲလို့ပဲပြောပြော၊ တိုးတက်လာရေလို့ပဲပြောပြော၊ လရတတ်ဘက်ယိမ်းလာရေလို့ပဲပြောပြော တိုးတက်ပြောင်းလဲမှုတိက ဟိနိန်တတ်ပါရေ။ ဥပမာ -ထိုင်ဝမ်၊ တောင်ကိုးရီးယား၊ ထိုင်း၊ တရုတ် စရေ နိုင်ငံတိရေ လွန်ခရေ နှစ်ပေါင်း ၂၀၊ ၃၀ အတွင်းမှာ လမွဲစာရင်းကနိန် လမွဲနာင့် လရတတ်ကြားနိုင်ငံအဖြစ်ကို ရောက်လာပါရေ။ အခုဆိုကေ ယင်းနိုင်ငံတိကို စက်မှုထွန်းကားနိုင်ငံသစ်များ (Newly Industrialized Country, NIC)လို့ ခေါ်လာကတ်ပါရေ။ NICနိုင်ငံအများစုကို အာရှတိုက်ဘက်မှာ တွိရပါရေ။ စင်္ကာပူ၊ မလေးရှား၊ ထိုင်း၊ ထိုင်ဝမ်၊ တောင်ကိုးရီးယား၊ တရုတ် စရေ နိုင်ငံတိပါပါရေ။ ယင်းနိုင်ငံတိမှာ စက်မှုလုပ်ငန်းတိ ထွန်းကားလာရုံသာမက အချေမွီးနှုန်းလည်း လျှော့ကျလာစွာကို တွိရပါရေ။ ယင်းချင့်က ဖွံ့ဖြိုးတိုးတက်တေ နိုင်ငံတိမှာ ဟိရေ လက္ခဏာတစ်ရပ်နာင့် လားကိုက်နိန်ပါရေ။

လမွဲနိုင်ငံတိမှာတော့ခါ စက်မှုကုန်ထုတ်နည်းပါးခြင်၊ ငွေစုနိုင်မှုနည်းပါးခြင်း၊ အိမ်ရာအဆောက်အအုံမလုံလောက်ခြင်း၊ လမ်းနာင့် ဆက်သွယ်ရေးစနစ်များ ညံ့ဖျင်းခြင်း၊ စိုက်ပျိုးရေးကဏ္ဍတွင် လုပ်ကိုင်သူ လုပ်သားများခြင်း၊ ကျန်းမာရေး ၀န်ဆောင်မှု မလုံလောက်ခြင်း၊ ပညာသင်ကျောင်းစနစ်များ မလုံလောက်ခြင်း၊ စာမတတ်သူဦးရေများခြင်း၊ အစာရေစာကောင်းကောင်းမစားနိုင်ခြင်း၊ အာဟာရဓာတ်ချွတ်ယွင်းခြင်း စရေ လက္ခဏာရပ်တိကို တွိရပါရေ။ ကမ္ဘာမှာဟိရေ လူ ၃ယောက်ထဲက ၂ယောက်ရေ လမွဲနိုင်ငံတိမှာ နိန်ကတ်ပါရေ။ ယေကေလေ့ ယင်းလူစုစုပေါင်း၏၀င်ငွေရေ ကမ္ဘာ့လူဦးရေအားလုံးဝင်ငွေ၏ ၆ပုံ ၁ပုံနာင့်ရာ ညီမျှပါရေ။ ယင်းလူတိ၏ကုန်ထုတ်အားရေ ကမ္ဘာ့လူဦးရေ၏ ၃ပုံ ၁ပုံနာင့်ရာ ညီမျှပါရေ။ ကမ္ဘာ့စက်မှုထုတ်လုပ်အားကဏ္ဍကကြည့်လိုက်ကေ ၁၀ပုံ ၁ပုံစာရာ ဟိပါရေ။

ထိုတစ်ရက်နိန့်က တီဗွီမှာ လာလို့ American Gangsterဆိုရေ ဘိုင်စကုပ်ကို ကြည့်လိုက်မိပါရေ။ ယင်းကားက အမေရိကားက ဘိန်းနာင့်မူးယစ်ဆီးဝါးရောင်းဝယ်ရေ လူမဲ Frank Lucasအကြောင်းကို ရိုက်ထားစွာပါ။ တကယ့်ဖြစ်ရပ်မှန်ကို ရိုက်ထားစွာပါ။ Frankရေ နယူးယော့ခ်မြို့အထက်မှာဟိရေ Harlemလို့ခေါ်ရေ မြို့ကနိန်ပြီးကေ မူးယစ်ဆီးရောင်းယင်း ချမ်းသာလာစွာလူပါ။ ယင်းလူက ဗီယက်နမ်စစ်ပွဲဖြစ်နိန်ရေ အချိန်မှာ ထိုင်း၊ ဗီယက်နမ်ဘက်ကို လားပြီးကေ ယင်းမှာက ဘိန်းအစစ်တိကို ယူပြီးကေ အမေရိကားကို တင်ပို့စွာပါ။ ဇလောက်ထိလုပ်လဲဆိုကေ ဗီယက်နမ်စစ်ပွဲမှာ သီလားရေ စစ်သားအလောင်းခေါင်းထဲမှာ ဘိန်းကိုထည့်ပြီးကေ အရှေ့တောင်အာရှက ဘိန်းကို အမေရိကားကို ရောက်အောင် သယ်ခစွာပါ။ အမေရိကန်စစ်တပ်ကလူတိနာင့် ပေါင်းပြီးကေ စီးပွားရေးလုပ်ခစွာပါ။ သူက ကကောင်းချမ်းသာလားကေလေ့ ဘိန်းစိုက်တေတောင်သူတိကတော့ လမွဲမှာလမွဲ၊ ဒုံရင်းမှာ ဒုံရင်းပါရာ။

ယင်းချင့်နာင့်ဆက်စပ်မိလို့ အာရှ၊ အာဖရိကနာင့် လက်တင်အမေရိကားက အမွဲဆုံးနိုင်ငံတိကို စိုင်းစားမိခီပါရေ။ ယင်းနိုင်ငံတိရေ ကုန်ကြမ်းတိကို ထုတ်ပြီးကေ ချမ်းသာရေတိုးတက်တေ နိုင်ငံတိ၏ အဖြည့်ခံနိုင်ငံတိအဖြစ်က ရုန်းမထွက်နိုင်ဘဲ သောင်တင်နိန်ကတ်ရစွာကို တွေးမိပါရေ။ မိမိနိုင်ငံကို တင်သွင်းရေ သွင်းကုန်ပစ္စည်းတန်ဖိုးက ဈီးတက်နိန်ရေအချိန်မှာ မိမိနိုင်ငံက ပို့လိုက်တေ ကုန်ကြမ်းဈီးက နဂိုအတိုင်းဟိနိန်ကတ်ပါရေ။ ဈီးကွက်စီးပွားရေးစနစ်ကို ကြိုးစားပြီးကေ တတ်သလောက်မှတ်သလောက်နာင့် ဖန်တီးနိန်ကေလေ့ ယင်းဈီးကွက်ကို ထိန်းချုပ်ထားကတ်စွာက ဖွံ့ဖြိုးပြီးနိုင်ငံက ကုမ္ပဏီကြီးတိပါ။ ယင်းကုမ္ပဏီကြီးတိ၏ ညစ်ပတ်ဈီးကဇတ်မှုတိအောက်မှာ လုံးချာလည်ပြီးကေ မတိုးတက်နိုင်ဖြစ်နိန်ပါရေ။ ချမ်းသာရေ ကုမ္ပဏီကတော့ ဆထက်တပိုး ချမ်းသာမြဲပါပျာယ်။ (ဗမာပြည်မှာလည်း ယင်းပိုင်ပါပျာယ်။ အခုဆိုကေ ကားရီကားရား "စည်းကမ်းရှိ ဒီမိုကရေစီ"ဆိုပြီးကေ ပျင်ပနာ စီးပွားရေလုပ်ငန်းတိကို ဦးပိုင်နာင့် တေဇပိုင်ရေ private ကုမ္ပဏီတိကို နာမေပြောင်းလွယ်ပြီးကေ နိုင်ငံ့စီးပွားရေး ယန္တရားကို ထိန်းချုပ်နိန်ကတ်ပါရေ။ ကုန်ကြမ်းထုတ်လုပ်တေ တောင်သူတိကတော့ လမွဲမှာလမွဲ ဒုံရင်းမှာ ဒုံရင်းပဲ ဖြစ်နိန်ရေ အချိန်မှာ ယင်းအသာစံလူတစ်စုကတော့ နိုင်ငံ၏အသီးအမြတ်တိကို စားပြီးကေ ဈီးကွက်ကို ထိန်းချုပ်နိန်ကတ်ပါရေ။)

ဗမာပြည်မှာရာမက ကမ္ဘာတစ်ခုလုံးမှာ ချမ်းသာရေလူက ပိုချမ်းသာလာပြီးကေ ဆင်းရဲရေလူမှာလည်း စားစရာမဟိအောင် ချွတ်ခြုံကျနိန်စွာကိုတော့ ပြောဖို့တောင်လိုဖို့မဟုတ်ပါ။ ကံကြမ္မာဆိုစွာက အပြောင်းအလဲဟိစမြဲပါ။ အဘိုးရှင် ရှင်မြ၀ါရို့၊ မဟာပညာကျော်၊ မင်းဗာဘုရင်ရို့ အိန္ဒိယကို လားပြီးကေ စာသင်၊ ပြန်လာ၊ ပြီးကေ နိုင်ငံကို တိုးတက်အောင် တည်ဆောက်ခရေပိုင် ရခိုင်ကံကြမ္မာကိုလည်း အခုလူငယ်ချေတိက ကြိုးစားပြီးကေ တည်ဆောက်ရဖို့ဖြစ်ပါရေ။ ဘ၀သဘာဝ၊ ပြောင်းလဲလာရေ ခေတ်ကို လက်ခံအသုံးမချဘဲ ငါတော့ ၀ါးတုတ်ပဲစားမယ်၊ အကောင်းစား ဟန်ဘာဂါ စားမှမဟုတ်ဆိုပြီးကေ နိုင်ငံကို ချစ်ပြလို့လည်း မရပါ။ လူဖြူနာင့်တွိကေ ပေါင်းသင်းဆက်ဆံလို့ ဟန်ဘာဂါဆိုင်မှာ စားချင်ကေလေ့ စားလီရပါဖို့။ တရုတ်နာင့်တွိကေလေ့ အသားလုံးဟင်းရည်သောက်ပြီးကေ ခေါ်က်ဆွဲကို တူနာင့် စားချင်လေ့ စားကတ်ရပါဖို့။ ကိုယ့်ပြည်က လူနာင့်တွိကေတော့ ငါးပိဟင်းနာင့် ၀ါးတုတ်နာင့် အားရပါးရ လက်နာင့် (ဇူး၊ ဇွန်းနာင့် မဟုတ်ပဲ) စားကတ်လီပါဖို့။ သူ့နေရာနာင့် သူ အံဝင်ဂွင်ကျ adapt (လိုက်လံပြောင်းလဲ) လားရပါဖို့။ အားလုံးသူနာင့် တည့်အောင်နိန်ပြီးကေ အဖရခိုင်ပြည်ကို အကျိုးပြုနိုင်ဖို့စွာချေတိကို စုဆောင်းလေ့လာကတ်ရဖို့မဟုတ်ပါလား။

ဆင်းရဲရေ နိုင်ငံတိ ဖြတ်သန်းရဖို့ ခရီးကတော့ စိန်ခေါ်မှုတိအပြည့်နာင့်ပါ။ ယေကေလေ့ ဆင်းရဲရေ နိုင်ငံတိရေ အမြဲတမ်းဆင်းရဲနိန်ရဖို့လို့တော့ ပြောလို့မရပါ။ အဂုနောက်ပိုင်းမှာ BRICဆိုပြီးကေ အသုံးအနှုန်းတစ်ခုပေါ်လာပါရေ။ နိုင်ငံတကာ စီးပွားရေးသုတေသီJim O'Neill ၂၀၀၁ခုနှစ်က ဘရားဇီး(Brazil)၊ ရာရှား (Russia)၊ အိန္ဒိယ (India)၊ တရုတ်(China)နိုင်ငံတိကို ပေါင်းလို့ခေါ်ထားစွာပါ။ ယင်းနိုင်ငံတိရေ တဟုန်ထိုး တိုးတက်ပြောင်းလဲလာနိန်ရေအတွက် စီးပွားရေးပညာရှင်၊ ရင်းနှီးမြှပ်နှံရေ လူတိ အနီးကပ်စောင့်ကြည့်မှုကို ခံနိန်ရရေ နိုင်ငံတိဖြစ်လာပါရေ။ ရှိရင်းစွဲ ထိပ်သီးအင်အားကြီးနိုင်ငံတိကိုတောင် ခြိမ်းခြောက်လာနိန်ပါရေ။ ဘရားဇီးနာင့်ရာရှားနိုင်ငံတိမှာရေ သယံဇာတပေါကြွယ်ဝရေအတွက် ၂၀၅၀ ၀န်းကျင်မှာ နိုင်ငံတကာမှာ ကုန်ကြမ်းဈီးကွက်ကို လွှမ်းမိုးနိုင်ရေ နိုင်ငံဖြစ်လာဖို့လို့ ခန့်မှန်းထားပါရေ။ ယင်းပိုင်ပျာယ် တရုတ်နာင့်အိန္ဒိယရို့ကလည်း ၂၀၅၀ခုနှစ်မှာ နိုင်ငံတကာထုတ်ကုန်ရောင်းဝယ်မှုနာင့် ၀န်ဆောင်မှုဈီးကွက်ကို လွှမ်းမိုးလာနိုင်ရေလို့လည်း ခန့်မှန်းထားကတ်ပါရေ။

စာရီးသူရေ အမေရိကန်ပြည်ထောင်စု အရိမြောက်ဘက်က Bostonမြို့မှာ နိန်ရေခါ အမေရိကားက ထိပ်တန်းတက္ကသိုလ်တိဖြစ်တေ MIT (Massachusetts Institute of Technology)၊ Harvard University ဘက်တိကို မကြာမကြာ ရောက်ဖြစ်ပါရေ။ MIT၀င်းထဲနာင့် Charles River ကမ်းဘေးနားကို ကားဖြတ်မောင်းကေ ယင်းမှာ ကျောင်းတက်နိန်ကတ်တေ တရုတ်တိ၊ အိန္ဒိယကုလားတိအများကြီးကို တွိရပါရေ။ ယင်းပိုင်ပျာယ် Harvard Square နားကိုလားကေလည်း အိန္ဒိယကုလားတိ၊ တရုတ်တိအများကြီးပါ။ ယင်းခါက လတ်တလောတွေးမိစွာက 'ဩော်.. အေသူရို့ ပညာရေးကို ဦးစားပီးရေမနားကူး'လို့။ ယေကေလေ့ သေချာဆက်ပြီးကေ မစိုင်းစားမိခပါ။

အိန္ဒိယမှာ တော်ရေလူတစ်ဒိုင်က ကောင်းတော်ရေဆိုစွာကိုတော့ခါ အချေခါက အကျွန်ရို့အင်္ဂလိပ်စာဆရာ ယူလာပီးရေ ၅နှစ်အရွယ် အိန္ဒိယကျောင်းသူတစ်ယောက် ရီးထားရေ အက်ဆေးကို ဖတ်ဖူးလို့တော့ သိထားမိပါရေ။ စကားလုံးအထားအသို၊ သုံးထားရေ စကားလုံးအသုံးအနှုန်းက ၅ နှစ်သမီးချေရီးထားရေလို့ မဆိုနိုင်လောက်အောင်ကို ကောင်းနိန်စွာကို မှတ်မိပါရေ။ ယေကေလေ့ တော်ရေ မနားကူးလို့ရာ စိတ်ထဲမှာ လလွယ်ချေ မှတ်ထားမိပါရေ။ ကြီးလာလို့ နိုင်ငံတကာကျောင်းကောင်းတစ်ခု ၀င်ခွင့်ရဖို့ ဇာလောက်ခက်လဲ၊ သူများနိုင်ငံမှာ ထိပ်တန်းကျောင်းတစ်ခုက ဘွဲ့ရဖို့ ဇာလောက်ခက်လဲဆိုစွာတိကို ကိုယ်တိုင်ဖြတ်သန်းလာရခါမှ ပိုပြီးကေ အလေးအနက်စိုင်းစားတတ်တေလို့ဆိုရပါဖို့။ ယင်းပိုင်ကျောင်းကောင်းတိမှာ အေလောက်တရုတ်တိ၊ အိန္ဒိယကုလားတိ စာလာသင်နိုင်ရေဆိုစွာရေ သူရို့တိ သူရို့လူမျိုးတိအတွက် ဂုဏ်ယူစရာပါ။

တစ်နှစ်တစ်နှစ်သူရို့လူမျိုးတိထဲက B.A၊ B.Scဘွဲ့အမျိုးအစားပေါင်းများစွာကို ရကတ်တေလူတိအများကြီးပါ။ ယင်းပိုင်ပျာယ် မဟာဘွဲ့တိ ရရေလူလည်း အများကြီးပါ။ ပါရဂူဘွဲ့ရရေလူတိထဲမှာဆိုကေ အမေရိကမှာနိန်ရေ လူဖြူတိထက်တောင် များပါဖို့သိ။ စာရီးသူဘွဲ့ယူရေခါ စာရီးသူကျောင်းမှာဆိုကေ ဘွဲ့ရလူ ဗမာပြည်က စာရီးသူတစ်ယောက်၊ ကုလားတိ၊ တရုတ်တိမှာဆိုကေ အနည်းဆုံးထောင်ဂဏန်းဟိပါဖို့။ ယင်းချင့်ရေ ကျောင်းတစ်ကျောင်းထဲက semesterတစ်ခုအတွက်ပဲ ဟိပါသိရေ။ အမေရိကားမှာ ဟိရေ သိန်းဂဏန်းဟိရေ တက္ကသိုလ်တိထဲမှာ တက်နိန်ကတ်တေ လူတိအများကြီးဟိပါဖို့သိ။ ယင်းချင့်တိက ဇာကို ရည်ညွန်းလဲဆိုကေ နောင်အနာဂတ်မှာ ကမ္ဘာ့သုတေသနကဏ္ဍ၊ ထုတ်လုပ်မှုကဏ္ဍ၊ စီးပွားရေးကဏ္ဍ၊ နည်းပညာကဏ္ဍတိမှာ ကုလားတိ၊ တရုတ်တိက ဇာနိန်ရာက နေရာယူလာကတ်ဖို့လဲဆိုစွာကို ပြသနိန်ကတ်ပါရေ။ အခုပိုင် သူရို့မိခင်နိုင်ငံကိုယ်တိုင်ကိုယ်က တိုးတက်လာရေဆိုကေ ပိုတောင်ဆိုးပါဖို့သိ။ ဇာဖြစ်လို့လဲဆိုကေ ဘွဲ့ရပြီးရေ လူတော်တော်များများကို သူ့ရို့မိခင်နိုင်ငံက အလုပ်ရှာပီးနိုင်ဖို့လို့ဖြစ်ပါရေ။ ကိုယ့်မိခင်နိုင်ငံကို ပြန်ပြီးကေ အကျိုးပြုပြီးကေ လရတတ်နိုင်ငံကြီးတစ်ခုဖြစ်လာအောင် ကြံဆောင်နိုင်ကတ်ဖို့လို့ဖြစ်ပါရေ။

ကမ္ဘာမှာဟိရေ လမွဲနိုင်ငံတိအများစုရေ မွဲပြီးယင်း မွဲယင်းပါပျာယ်။ ယင်းအထဲက တချို့ကလည်း လမွဲနိုင်ငံက ရုန်းထွက်လို့ လားနိုင်ခကတ်ပါရေ။ တချို့ကဆိုကေ တဟုန်ထိုးတိုးတက်ပြီးကေ လက်ရှိထိပ်သီးနိုင်ငံတိကိုတောင်မှ ခြိမ်းခြောက်လို့လာနိန်ပါပျာယ်။ အကျွန်ရို့ရခိုင်လူမျိုးတိထဲကလည်း ခေတ်အခြေအနေကို သုံးသပ်ဆင်ခြင်ပြီးကေ လမွဲကနိန် လရတတ်နိုင်ငံဖြစ်အောင် ၀ိုင်းဝန်းကြံဆောင်နိုင်ရေ လူငယ်မျိုးဆက်သစ်တိ အများကြီးပေါ်ထွက်နိုင်ပါဇီလို့ ဆန္ဒပြုမိပါရေ။

မှီငြမ်း
1. Palen, J. John; The Urban World, Seventh Edition, Mc Graw Hill, New York, 2005.

2. Wikipedia, BRIC, http://en.wikipedia.org/wiki/BRIC, accessed on July 18, 2010.

2 comments:

Admin said...

ပို့စ် ခေါင်းစဉ်နဲ့ လိုက်တယ်အကိုး ကျွန်တော်ကတော့ အေပို့စ်ကို ကောင်းသဘောကျရေ...

Kyaw Htoo Aung said...

Thanks, bro!

Post a Comment

 
© Copyright by AS  |  Template by Blogspot tutorial